Aralarreko Hegoaldeko Exekutiba gaur arratsaldean bildu da Donostiako bere egoitzan, eta bertan atzoko Hauteskunde Orokorretako emaitzen balorazioa egin du. Jon Abril Aralarreko koordinatzaileordeak agertu duenez, “EAEn gertatu diren emaitzak guztiz kezkagarriak dira, bereziki indar abertzaleentzat; porrota izan da abertzaleentzat, 200.000 boto galdu ditugulako guztion artean”. Horri aurre egiteko, indarren metaketa beharrezkoa dela esan du.

Araban, Bizkaian eta Gipuzkoan indar abertzaleek izandako emaitzekin kezkatuta azaldu da Abril. “Indar abertzaleek 200.000 boto galdu izanak erakusten du gizartea nazka eginda dagoela eta aldaketak eskatzen dituela”. Aralarreko koordinatzaileordeak gogoratu du joan den urrian indarrak metatzea beharrezkoa zela azaldu zuela Aralarrek, “baina ezezkoa jaso genuen; nahiz eta batzuk beharrezko ikusi zuten ezezkoa jaso genuen, eta atzoko emaitzek diote ez geundela hain okertuta”.

Egoerari aurre egiteko, alderdi abertzaleen indar metaketa eskatu du berriro: “Espainiako indarrek gehiengoa lortzeko aukera gehien dituztenean eta euskal ahotsa eramatea zailagoa denean, berretsi nahi dugu indar metaketa beharrezkoa dela”. Abrilek gaineratu duenez, indar abertzaleek hausnarketa sakona egin beharko dute. “Batzuen bide antzuek eta besteen alderdikeriek ez digute utzi, eta horrela jai dugu abertzale eta independentistok. Abertzaleok eta bereziki ezker abertzaleko kideok hausnarketa egin behar dugu eskaintza erakargarria egiteko”.

Atzo Aralarrek lortutako emaitzen inguruan, Abrilek esan du gustura daudela emaitzekin, orain 4 urteko emiatzen parean geratu direlako. “Botoa fidelizatu dugu, eta boto emaile horiei eskerrak Aralarren proiektuarekiko erakutsi duten atxikimenduarengatik”. Gogoratu duenez

Patxi Zabaleta Aralarreko koordinatzaileak, bere aldetik, atzo Iparraldean Euskal Herria Bai koalizioak lortutako emaitza onak aipatu ditu. “Euskal Herria Baik emaitza onak lortu zituen, eta gure alderdi senide den Abertzaleen Batasuna izan da koalizio hori aurrera eramaten ahaleginik handiena egin duena, ez bakarrik ekarpenik handiena egin duena baita ere emaitza handiena ekarri duena izan da”.

Nafarroa Bairen emaitzen inguruan esan du emaitza duinak lortu dituela. Izan ere, orain 4 urte baino 1.000 boto gehiago lortu ditu, eta mantendu du bere ordezkaritza Madrilen. “Ez dugu berdindu joan den maiatzeko maila, baina oinarri bat dugula erakutsi dugu”.

EAEko emaitzen inguruan, kezkagarriak direla adierazi du, eta Abrilek egindako moduan, indarren metaketa eskatu du: “Aralar saiatuko da Euskal Herriak eta abertzaleok ditugun erronkei erantzuteko; ez da besteek egin dutenari edo inguruan gertatzen denari begiratzea. Abertzaleok zer eskaintzen dugun begiratu behar dugu, eta gizarteari zer eskaini behar dugun hausnartu behar dugu, gure gabeziak zeintzuk diren jakiteko”.

Aralar da alderdi abertzale eta soberanisten artean emaitzei eusten dien alderdi bakarra

Aralarrek balorazio ona egin du, Hauteskunde Orokorretako emaitzak ezagutu ondoren. Aralarrek orain 4 urteko emaitzei eutsi diela nabarmendu du Jon Abril Aralarreko koordinatzaileordeak. Aralarrentzat emaitzak onak izan diren arren, indar soberanistek gogoeta egitea eskatu du, oro har behera egin dutelako. Hala ere, azpimarratu du Abrilek “Aralar dela alderdi abertzale eta soberanisten artean emaitzea eusten dien alderdi bakarra”.

Ildo horretan, Aralarrek orain hilabete batzuk adierazitakoaren arabera, “agerian geratu da indar soberanista eta abertzaleen metaketa eta elkarlana beharrezkoa dela. Indar abertzaleen arteko elkarlana eskatu genuen orain hilabete batzuk, Euskal Herria Bai aldarrikatu genuen, eta gaurko emaitzek agerian utzi dute herri honek hori behar zuela”.

Gustura lortutako emaitzekin

Aralarren koordinatzaileordea gustura agertu da alderdiak izandako emaitzekin. Izan ere, “orain dela lau urte lortutakoen antzekoak izan dira. Zentzu horretan, pozik egoteko moduko emaitzak dira eta hazten ari den indarra da Aralar. “Aralar izan da alderdi abertzale eta soberanisten artean emaitzei eusten dien alderdi bakarra”. Horregatik, Abrilek azpimarratu du “alderdi sozialistak Araban, Bizkaian eta Gipuzkoan irabaztea eta Espainian gehiengo absolututik hurbil gelditzea ez dela, inondik ere, albiste ona Euskal Herriarentzat”.

Emaitzak ikusi

Aralarrek agerraldia egin du gaur arratsaldean, Isaias Carrasco militante sozialistaren hilketa baloratzeko. Jon Abril Aralarreko koordinatzaileordeak esan duenez, “heriotza honi euskal gizarteak eman diezaiokeen erantzunik onena eta irmoena igandean bozkatzera joatea da, egiten den aukera politikoa edozein dela ere”.

Isaías Carrasko PSE-EEko zinegotzi ohi eta militantearen hilketaren aurrean, honakoa agertu nahi du Aralarrek:

- Gaitzetsi egiten dugu Isaías Carrascoren heriotza, eta guztiz deitoragarria zaizkigu gisa honetako hilketak. Bortizkeria ez da gatazkak konpontzeko bidea, eta bide politiko soilen aldeko apustua berresten dugu. Giza eskubide guztiak salbuespenik gabe aldarrikatzen ditugu.

- Gure elkartasun osoa agertu diegu hildakoari, bere senitartekoei, zein alderdi sozialistako kide guztiei, eta hori bera berretsi nahi dugu gaur. Eta heriotza honen gehiegikeria salatzeko deituko diren kontzentrazio eta agerraldietan Aralar egonen dela aurreratzen dugu.

- Batasunari dei egiten diogu bide politikoen aldeko apustu irmoa egin dezala. Eta hilketa honekin ados ez dauden pertsona eta kolektiboei eskatzen diegu argi eta garbi adierazi dezatela euren desadostasuna publikoki, kalean. Hori baita herri honetan bakea eraikitzeko modurik sendoena.

- Aralarrek herri honetan ezker abertzale politiko eta bakezalearekiko konpromisoa aldarrikatzen du, eta ezker abertzale politiko eta bakezale hori eraikitzen ari garela nabarmendu nahi dugu. ETAk atentatzen jarraitzen duen arren, Aralarrek, gaur, inoiz baino indar gehiagorekin berresten du bide demokratikoekiko bere konpromisoa eta lanerako tinkotasuna.

- ETAk hauteskunde kanpainan presentzia edukitzeko eskuhartzea salatu nahi dugu, eta hautesleak baldintzatzeko egindako ekintza nabaritzat jotzen dugu. Edonola ere, egoera honen aurrean, herritarrak lasaitasunera deitzen ditugu.

- Gaurko heriotza honi euskal gizarteak eman diezaiokeen erantzunik onena eta irmoena igandean bozkatzera joatea da, egiten den aukera politikoa edozein dela ere.

Arrasaten izandakoaren ondoren, Aralarrek bertan behera utzi ditu kanpaina itxierako ekitaldiak.

Prentsaurrekoa deitu dute Aralarrren zuzendaritzakideek 17:30erako, Donostiako egoitzara; Arrasateko atentatuaren inguruko balorazioa egiteko. 

Aralarreko koordinatzaileorde Jon Abril eta Araba, Bizkai eta Gipuzkoako Kongresurako eta Senaturako zerrendaburuak prentsaurrekoa eskaini dute Bilbon, gaur goizean, kanpainaren balorazioa emateko. Abrilek adierazi duenez, “Aralarrena da botorik eraginkorrena; Aralarrena da boto errebeldea”. Ezkertiar eta abertzale guztiak botoa ematera deitu zituen, “independentziarako beste urrats bat izango delako”.

Datorren igandean eginen diren Espainiako hauteskundeak erabat giro nahasi eta gaiztotuan eginen dira. Eta giro hori sumatu ahal izan dugu kanpainan zehar ere.

Batetik, legez kanporatutako alderdiek ezin izanen dute bertan parte hartu, milaka herritarren eskubideak urratuz ezin izan baitute euren burua aurkeztu, eta euren aukera politikoa ezabaturik ikusi dutenak. Egoera hau behin eta berriz salatzen aritu da Aralar, orain baino lehen ere, eta Alderdien Legea bertan behera uztea ezinbestekoa da gure irudiko.

ANVk eta EHAK-k abstentziorako deia egin dute datorren iganderako. Aukera guztiak dira zilegi, baina une honetan eta planteatu den moduan, abstentzioa kaltegarria da herri honentzat. Abstentzioa eraginkorra izan dadin masiboa izan behar da, gehiengoaren babesarekin egindakoa. Eta abstentzio hau ez da horrela planteatu. Baina gainera, abstentzioak alderdi politikorik handienak babesten dituen neurrian, PSOE, PP eta bereziki EAJ indartuko ditu.

Edonola ere, abstentzioa eskatzea zilegi bada ere, onartezina iruditzen zaigu, legez kanporatutakoek abstentzioa eskatzeko erabili dituzten moduak, eta bereziki, Aralar eta Nafarroa Bairen kontrako kanpaina itsua.

ETAk ere kanpainan agertu nahi izan du, agertu behar izan du. Bilbon lehergailu bat jarriz eta abstentziorako eta boikoterako deia eginez agertu da. Motibo nahikoa hauteskundeetan bozkatzeko, ETAk ez digulako agintzen zer egin behar dugun, eta are gutxiago gure botoarekin zer egiten dugun.

Zapatero eta Rajoyren arteko eztabaida faltsua saldu nahi izan digute Espainiako hedabideek eta PSOEk zein PPk. Euskal Herriko hainbat alderdi politikok bipartidismorako joera kritikatu dute, baina aldi berean, EITBko administrazio kontseiluan duten ordezkaritzaren bitartez, komunikabide horretako eztabaida saio guztietatik kanpo utzi dute Aralar bera.

Kanpaina irudimentsua egin dugu. Baliabide gutxirekin, baina herritarrengana mezu zuzena, eta kaleko jendearentzat ulergarriak diren mezuak emanez. Eta ez dugu guk esaten hori, zuek, kazetariek nabarmendu duzue hori. Izan ere, kanpaina honetan Aralarrek bere leloarekiko fideltasuna agertu nahi izan du. Ezkerra berria eraikitzeko konpromisoa agertu dugu, eta Euskal Herria ezkerretik eraikitzekoa. Kultura politiko berria egiten ari gara instituzioetan, eta hori bera islatu dugu kanpainan zehar, badagoela politika, eta ondorioz kanpaina, egiteko beste modu bat.

Hori da Aralarrek duen balio erantsi nagusia. Ausartak gara politika egiten. Argi azaltzen dugu zer pentsatzen dugun, ezkutatu gabe. Ezker abertzale berria eraikitzen ari gara, zibila eta zabala. Ezkerra eta abertzalegoa ulertzeko beste modu bat. Hiru ideia horiekin aurkeztu gara hauteskunde hauetan: ezker eraginkorra eta eraldatzailea garela; politika egiteko molde berria dugula, eta  Euskal Herriaren ahotsaren ordezkaritza garela. Ez du inork Aralarrek bezala ordezkatuko ezkerreko balorerik, ez eta Euskal Herriaren interesak ere.

Eta inkestak inkesta, Aralar da soberanisten artean gorako joera duen alderdi bakarra. Gu gara etorkizuneko indarra, gaurko eta etorkizuneko ezker abertzalea. Eskura dugu Madrilen ordezkaritza lortzea. Ilusioz lepo gaude, eta Euskal Herritarrei, ezkertiar eta abertzaleei dei egiten diegu Aralarren papeletak eskuetan, bozkatzera joan daitezela datorren igandean.

Aralarren botoa da independentziarako bidean jarriko gaituena, gizarte honen aniztasuna bildu eta horren alde lan eginen duena. Aralarrena botorik eraginkorrena da. Aralarrena da boto errebeldea.

Aralarreko hautagaiak eta ordezkariak Jaizkibelgo maldetan izan dira gaur goizean, Pasaiako superportua eraikiko duten gunearen gainean. Iñaki Irazabalbeitia Kongresurako Gipuzkoako zerrendaburuak esan du Hondarribiako aireportuaren, Renferen eta Pasaiako portuaren transferentzia eskatuko duela Madrilen. “Azpiegitura horiek geronek kudeatzeak herritarrei zerbitzu hobea eskaintzea ekarriko du”.

Gipuzkoari eragiten dioten garraio-azpiegituren auzian, Aralarrek dio auziari ikuspegi global batetik begiratu behar zaiola, ikuspegi probintzialista hutsetik haratago. Baiona-Donostia eurohiriaren eta Euskal Herriaren ikuspegitik egin behar zaio so.

Lehenik eta behin, Aralarrek Hondarribiko aireportuaren, Pasaiako portuaren eta RENFEren trenbidearen transferentzia eskatzen du. Azpiegitura horiek geronek kudeatzeak herritarrei zerbitzu hobea eskaintzea ekarriko du.

• Aralarrek uste du Euskal Herriak behar duela Europarekin eta Iberiar penintsularekin lotuko dituen prestazio handiko trena eta tren horrek pasaiariak eta merkantziak garraiatu behar dituela. Aldi berean, Euskal Herria barnetik egituratuko duen tren-sarea osatu behar da, eskualdeak eta herriak lotuko dituena. Euskal Yak ez dio behar horri erantzuten. Urrunetik datozenak eta urrunera doazenen ikuspegitik dago diseinatuta eta Euskal Herrian hiriburuak baino ez ditu lotuko. Jakina denez, EAEren barruan egunero egiten diren bidaien % 3 baino ez da hiriburuen artekoa, % 97 delarik eskualdeen artekoa. Eliteei erantzuten die Euskal Yak ez herritar xumeen eguneroko beharrei. Aralarrek onesten duen prestazio handiko trenak egungo RENFEren lineatik joango litzateke, linea horri egin beharreko hobekuntzak eginda, adibidez: Altsasu eta Beasain artean egiten duen begizta kenduta, Gasteiz eta Bilbo artean trenbidea egitea Forondako aireportutik paseaz. Gainera, Altsasun izango luke lotunea Ebroren ardatzetik datorren trenbidearekin.

• Hondarribiko aireportuaren auzian, Aralarrek uste du Biarritzeko eta Hondarribiko aireportuak elkar osagarriak direla eta elkarrekin egin behar dutela lan. Gure eredua, ‘aireportu bat eta bi terminal’ da; Biarritz-Donostia aireportua eta Biarritzeko eta Hondarribiko terminalak, bakoitza trafiko-mota batean espezializatua. Horrek eskatzen du Lapurdiko erakundeak Ortzibian sartzea eta Gipuzkoakoak Biarritzeko aireportuaren partzuergoan.

•  Pasaiako badiaren eraberritzea eta kanpo-portua ez dira eskutik joan behar duten proiektuak. Badiaren eraberritzeari ja ekin behar zaio Pasaitarren bizi-kalitatea hobetzeko. Zentral termikoa kendu egin behar da eta txatarra maneiatzeko ziloak eraiki behar dira eta Herrera aldetik hasita ekin behar zaio eraberritzeari. Pasaiako badiaren etorkizuna hiru oinarri izango ditu: balio erantsi handiko merkantzien portua, Donostialdeko kirol-portua eta herritarren beharrak asetzeko garapen urbanistiko jasangarria: itsas museoak, pasealekuak, babes ofizialeko etxebizitzak, jarduera ekonomiko garbiak, …. Aralarren ustez Pasaiako kanpo-portuak ez du zentzurik, eraso ekologikoa izateaz gain, errentagarritasun ekonomikorik ez duelako. Gainera, euskal kostaldean beste bi portu ere baditugu, Baionakoa eta Bilbokoa eta horiekiko osagarritasuna bilatu behar du Pasaiakoak.

Laburbilduz,

1. Aralarrek portuak, RENFEko trenbidea eta aireportuak Eusko Jaurlaritzari transferitzea eskatuko du.
2. Euskal Herriak Europarekin eta Iberiar penintsularekin prestazio handiko tren-konexioa ezinbestekoa du pertsonak eta merkantziak garraiatzeko eta, aldi beren, barnetik egituratuko duen trenbide-sare zabala. Y grekoa ez da irtenbidea.
3.  Hondarribiko aireportuaren pista luzatzea ez da beharrezkoa. ‘Aireportu bat eta bi terminal’ kontzeptua aplikatu behar da eta elkarlana bilatu. Miarritze-Donostia aireportua eta Miarritzeko eta Hondarribiko terminalak dira etorkizuna.
4. Pasaiako badiaren eraberritzeari bai gaur bertatik hasita eta kanpo-portuari ez. Iberdrolako zentrala itxi egin behar da eta txatarra tratatzeko ziloak eraiki. Pasaiako badian bateragarriak dira, merkataritza-portua, kirol-portua eta herritarren zerbitzurako hirigintza.

Aralarren Gipuzkoako kongresurako zerrendaburu Iñaki Irazabalbeitia diariovasco.comen izan da zuzeneko bideogaldeketan parte hartzen.
Hemen elkarrizketa osoa

Emakumeak lehen mailako hiritartzat onartuak izan daitezen Madrilen neurriak eta ekimenak bultzatzeko konpromisoa hartu du gaur Aralarrek. Agerraldia egin dute gaur Aralarreko hautagaiek eta ordezkariak, eta bertan azaldu dituzte zeintzuk izango diren emakumeen eta gizonen arteko berdintasuna lortzeko asmotan Madrilgo Kongresuan aurkeztuko dituzten proposamenak. Iñaki Irazabalbeitia Kongresurako Gipuzkoako zerrendaburuak esan duenez, ez da epelkerietan ibiliko emakumeen kontrako bortizkeria borrokatzeko.

“Gizartearen aurrean konpromiso irmoa hartzen dut edozein diskriminazioaren aurrean epelkerietan ez naizela ibiliko, eta bereziki emakumeen kontrako bortizkeria borrokatzeko lehen lerroan izango nauzuela, emakumeok eta gizonezkook elkar hartuta gaitz hau betirako gure gizartetik desagerraraz dezagun”, adierazi du.

Kongresurako Gipuzkoako zerrendaburuak esan duenez, Aralarrek neurriak bultzatuko ditu Kongresuan emakumezkoen eskubideak babesteko eta diskriminazioarekin bukatzeko. Besteak beste, abortoaren despenalizazioa eskatuko du Aralarrek, eta biolentzia matxista borrokatzeko edo alargunak babesteko neurriak exijituko ditu.

Emakumeen kontrako bortizkerian sakondu du Irazabalbeitiak. “Garbi dago horrekin bukatzeko babes-neurri juridiko eta polizialak beharrezkoak direla, baina Aralarren ustez, haratago joan behar da. Emakumeen kontrako bortizkeriarekin bukatzeko, gizartearen, eta bereziki, belaunaldi berrien hezkuntzan lan handia egin behar da”. Balioetan, besteenganako errespetuan, berdintasunean eta matxismoaren arbuioan heztea sustatuko du Aralarrek.

Beste alde batetik, Irazabalbeitiak gizonezkoen parte-hartzea eskatu du, emakumeen kontrako indarkeriarekin borrokazeko. “Borroka horretan gizonezkook lehen lerroan jarri behar dugu, eta eredu izan behar dugu gure jarrera, ekimen eta inplikazioarengatik”.

IPREM (Eragin anitzeko errenten adierazle publikoa) SMIrekin  (Lanbidearteko gutxieneko soldata) parekatzea eskatuko du Madrilgo Kongresuan. Era horretara pentsioak igotzea lortu nahi du. Aralarreko hautagaiak eta ordezkariak Donostiako San Martin azokan izan dira gaur goizean, pentsioarekin bizi den pertsona batek zer erosi ahal duen erakusteko.

Iñaki Irazabalbeitia Kongresurako Gipuzkoako zerrendaburuak azaldu duenez, Aralarren helburua da Espainiako Gobernuak IPREM eta SMI parekatzea. IPREMa Jose Luis Rodríguez Zapatero agintari sozialistak 2004. Urtean sortutako adierazlea da. Ordura arte, pentsio guztiak SMIren arabera ezartzen ziren edo babes ofizialeko etxebizitza bat lortu ahal izateko baremazioa SMIaren araberakoa zen.

Irazabalbeitiak zehaztu duenez, gaur egun SMIa 600 eurotan dago, eta IPREMa 516 eurotan. “Pentsioak ez dira igo SMIa beste, eta horrekin amaitu behar dugu. Horren asmoarekin doa Aralar Madrilera”.

Kongresurako Gipuzkoako zerrendaburuak galdetu dio Zapaterori ea hori den agindu zuen gizarte politika. “Hauek dira Zapaterok bere agintaldiaren hasieran agindu zituen ezkerreko politikak eta neurriak? Zapaterok lortu duen gauza bakarra da pentsiodunek beren erosteko ahalmena galtzea”.

Pentsioen kasuistika oso zabala dela agertu du Irazabalbeitiak, baina ia denek daukate komunean pentsio hori jasotzen duten pertsonek ez dutela bizi baldintza duinetan bizitzeko aukerarik. “Horregatik eskatzen dugu IPREM SMIrekin parekatzea, horrek eragin zuzena izango duelako pentsioetan”, Gogoratu du, Aralarrek SMIa 1.200 eurotara igotzea eskatuko duela Madrilen, azken azterketek erakusten dutelako gipuzkoar batek 1.050 euro behar dituela gutxienez hile amaierara heltzeko.

Aralarreko ordezkariak hainbat datu eman dituzte egun dauden pentsioen inguruan. Autonomoa izan den pentsiodun batek 694 euroko pentsioa dauka hilean, eta SOVIko (Erregimen orokorra baino lehen, 1967. urtea baino lehen, kotizatu zutenen pentsio mota), 335 euroko pentsioa dauka hilean. SOVIaren barruan dauden alargun batek 288 euroko pentsioa dauka hilean.

Irazabalbeitiak azpimarratu du Aralarrek lortu duela Nafarroako Parlamentua SOVIa gainontzeko pentsioekin parekatzea. “Horrek erakusten du Aralarrek proposamen zehatzak egiten dituela eta aurrera ateratzen dituela”.

Aralarreko hautagaiak eta ordezkariak Donostiako Garbera merkataritza gunean izan dira gaur goizean, ingurumenaren inguruan Madrilera eramango dituzten proposamenak aurkezteko. Kongresurako Gipuzkoako zerrendaburu Iñaki Irazabalbeitiak azaldu duenez, zabor gutxiago sortzeko lege aldaketak exijituko ditu Aralarrek, besteak beste, Ontzi eta ontzi-hondakinen Legearena eta Hondakinen Legearena.

Ingurumenaren defentsa egingo dugu, garapen jasangarriaren bidean jartzeko, eta gure oinordekoek bizitzeko moduko lurra eskuratu ahal izateko.

Besteak beste, proposamen hauek egingo ditugu:

• Garraio-eredu jasangarria bultzatuko dugu: garraio publikoa bultzatuko dugu, bereziki trena merkantziak eta pertsonak garraiatzeko; AHTren eredutik haratago, aldiriko trenak hobetu eta linea berriak sortzea eskatuko dugu.

• Berotegi efektuaren aurka egingo dugu, eta klima-aldaketa saihesteko neurriak hartzea eskatuko dugu; energia berriztagarrien alde, energia nuklearrari ezetz esango diogu, eta ez Garoñako zentral termikoa ixtea exijituko dugu. Automobil hibridoak sustatzea eskatuko dugu, eta kontsumo handikoak fiskalki zigortzea proposatu.

• Lurzoruaren gehiegizko okupazioari ezetz esango diogu (hau arazo larria da Gipuzkoan), azpiegitura politika zuhurra eta ingurugiroarekiko errespetatzen duena egingo dugu.

• Landare transgenikoei moratoria ezartzea eskatuko dugu.

• Zaborrak gutxiagotzeko Ontzien eta ontzi-hondakinen legea eta Hondakinen legea aldatzea eskatuko dugu, zabor gutxiago sortzeko. Era horretara, Ontzi eta botila berrerabilgarrien erabilpena indartuko da eta botilak berrerabiltzeko eta itzuli behar ez diren ontziekin bukatuko dugu, besteak beste.

Gipuzkoa zaborren kudeaketa arazo larria da, konponbide egokia eta azkarra behar duena. Errausketaren eztabaidan batzuek eta bestek esaten dute, zaborrik onena sortzen ez den zaborra dela.  Bi adibide: madalenak eta botilak. Horrek, alde batetik eskatzen du, gizarteak kontzientzia har dezan zabor gutxiago sortu behar dela  lan egitea eta, bestetik, horri babes legala ematea. Horrek eskatzen du aldatzea duela hamar urte inguru eman ziren Ontzien eta ontzi-hondakinen legea eta Hondakinen  legea jasangarritasunaren bidean jartzeko. Horrela zabor gutxiago kudeatu behar izango dute mankomunitateek eta lehengaien zarrastalkeria saihestuko dugu.

Hortaz, Aralarrek konpromisoa hantzen du Kongresuan ekimen legegileak bultzatuko dituela Ontzien eta ontzi-hondakinen legea eta Hondakinen legea aldarazteko hiru helbururekin besteak beste:

• Marketing irizpide hutsengatik produktuen gehiegizko zorro eta bildukiekin usatzea zigortzeko;

• Produktu eta ontzi berrerabilgarrien erabilera  bultzatzeko, adibidez, beira lehenestea plastikoaren aldean;

• Eta itzuli behar ez diren beirazko ontziekin bukatzeko.

• Uraren kultura berri bat gizartean sustatzeko ahalegina egingo dugu, eta horren harira, Ebroaren trasbasearen kontra egingo dugu Kongresuan.